دردشة مع والدتي...حول الانجازات والتغيير في العراق.....(.4 ).......علي ألأسدي

" لا  أحد ير يد النصيحة بل يريدون فقط التأييد "

" جون شتاينبك "

دخلت الوالدة الى البيت عائدة من زيارة صديقتها أم عبد السادة ، وبادرتني بالسؤال، شفت يمة أخبار الظهر بالعراقية؟

أجبتها : لا لم أشاهدها ، ولماذا العراقية؟

أجابت:

لأن أم عبد السادة ماتشوف غيرالشرقية عبالك بس هيه تحجي الصدك وغيرها لع، من الصبح للظهر مكابليها وكاعدين كلشي ما كالت على إنجازات الحكومة تالي عفتها وجيت ، كلت بلكت العراقية تطيهه. من هاي كتلك أردشوف الأخبار بالعراقية ، لأن الشرقية بس تهاجم الحكومة ، آني نوبات أكول ويا نفسي ذولة يمكن بعثية ، لأن ما يجيبون طاريهم بشين ، ملاحظ هذا يمة ، أنته حقك ، لأن بالشغل ، وما عدك وكت ، لكن آني كاعدة  واشوفهن كلهن ،  ما شفت قناة مثلهه ، عبالك  قناة الشباب مال المنبوش الصفحة إبن صدام.

سألتها لماذا هي مهتمة بالانجازات ؟

فاستطردت قائلة:

لا مو على شي يمة ، بس أكول ما بقه شي على الانتخابات ، ولازم الحكومة تطلع بيان بالانجازات اللي قامت بيهه بهل الخمس سنين ، لأن هذا وكتهه يمة ، حتى تعرف العالم شسوت ما سوت ، حتى الآحزاب ما ترشح الناس الفاشلة ، مثل ذولة اللي انتخبناهم ذيج النوبة للمجلس ، وطلعوا لا من وره ولا من كدام ، ما عرفوا غير نفسهم ، ما أكلك ولا تكلي ، سووا اللي يفيدهم ونسوا أهل الخايبة.

ما كو عاقل يسويهه و ينتخبهم نوبة لوخ بعد كل صخام الوجي اللي سووه ، واللي يرشحهم هم راح يسود وجه ، ويمة لو اشتغلوا بنية صافية ما يخالف ، لكن شوف شلون قانون انتخاب سووا ، بس يخدم مصالحهم ، ومكضيهه بالقال والقيل ، ولا يوم واحد منهم حجه على الماي والنظافة ورواتب المتقاعدين والمعاقين والايتام والارامل وعلى هالضيم العايشين بيه ،  أبد ، هاي مالهم شغل بيهه.

 هسه لو ناخذ كل الوزارات بالسره وحدة وحدة ، راح تشوف شكد همه مقصرين بواجبهم. بيش نبدي؟  كول ويايه ، خل انكول الكهرباء ، وين وصل بناء المحطات اللي كال عنها وزير الكهرباء ، شي عشر محطات تقريبا تعاقد عليها مثل ما كال ، لكن ماحد يعرف المحطة الفلانية بدوا صدك بيهه لو لع ، ولو بدوا شوكت تنتهي ،  بيا يوم ، لو بفلان سنة. لازم يراوون صورها وين وصل الشغل ، مو هيج كوتره ، كله زمط مابيه معنى، هاي صارنه خمس سنين على هالديدان ، وما ابنت ولا محطة كهرباء وحدة ، شلون وزير هذا ، وشلون حزب اللي عينه بالهمنصب ، أكو مجنون ينتخبه لهذا لو رشح بالانتخابات مال باجر ، هذا شي مايصير أبدا.  

نجي هسه على الزراعة يمة ، تعرف شسوت من آبار ماي ، شكد استصلحت أراضي جديدة للزراعة ، وشكد  زاد انتاج الحنطة والشعيرمن يوم ماجتي الحكومة لي هسة ، وشكم نخلة رشوا عليه مواد المكافحة؟  لأن بعد شكم سنة ماراح تبقى ولا نخلة بالبلد لو ما كو مكافحة ، أنت تدري يمة لو جانت أكو مكافحة من صدك ، جان ما مات نص النخل بالعراق. بس يمة أنت تعرف شنو اسم وزير الزراعة لو شكله؟ أني ماشايفته أبد ، وتريد الصدك آني ما شايفة وزير يحجي بالتلفزيون ويكول للشعب عن منجازات وزارته. يكولون أكو ثلاثين وزيربالحكومة ، بس ليهسة ما شايفة واحد منهم ، عبالك عدهم غير أشغال بغير بلد.

 يمة سمعت شي عن انجازات وزارة الصناعة ، شمسوين من مصانع وانتاج ، وشكد شغلوا عمال من العاطلين ، ترى هذا كلش مهم ، لأن خلق فرص عمل للعاطلين أهم واجب على الوزارة ، لأن هذا يخلي الناس تتحسن حالتها ، والارهابية  ما تكدربعد تقشمرهم بشكم فلس ، لأن صارت عدهم مصلحة وراتب. آني أم عقلين جنت  بس احجي على هالمكرود وزير الكهرباء وعلى امانة العاصمة عبالك بس همه مهمين ، وناسية شغلة الصناعة شكد مهمة. يمة انت سمعت شي عن المصانع اللي يكولون عليها عملاقة ، ليش واكفة ما تشتغل من يوم دخلوا لمريكان؟ والله شي يحرك الكلب ، أي  ليش هاي سبع سنين واكفة؟ جان فادت العمال والشعب ، أي  هيه جاهزة بس يريدلها همة ، بس ويامن تحجي وشنو تكول ، شي يجنن المايجنن.

أكلك يمة أخاف ما كو وزير صناعة بالحكومة ، لأن ما سامعته ولا شايفته من يوم شكل الوزارة المالكي ،يصير توفى ما علنوا عنه ، بس حتى لو متوفي يخلون غيره ، وإذا جان صدك موجود يعني ما كو فايدة من وراه ، لو يلغوها للوزارة أحسن ، لأن من يوم تشكيل الوزارة  لي هسة لا حس ولا نفس ، لا يوم افتتحوا مشروع ، وأنتجوا سلعة بيهه فايدة ، ولا اسمعنا أحد توظف  من المهندسن والعمال الكاعدين لا شغل لا عمل.  زين ما دكلي يمة لعد شسوا الوزير بهالمدة  كلها ، هيج يروح الصبح ويرجع العصر ايد من ورة وإيد من كدام ، وعله شنو ياخذ راتب؟ وانت يامالكي ، شلون مكعدة بالوزارة بلا شغل وبلا عمل.

شوف يمه شوف ، هاي وين دايحجي هذا المذيع ، جني اسمعته كال الناصرية ، أي الناصرية ، شوف يمة شلون داير مداير البيوت ماي المجاري ، شوف الزبايل مكومة قبال البيوت، ألله واكبر ، شلون أمانة بلدية هاي.  شوف يومة ، هي غير صورة ، شوف الناس وين ساكنين كلهه خرايب ، عفية دولة ما عدهه رحمة على أبناء بلدها ، الله أوأكبر.

شوف شوف يمة هاي صورة لخ ديرويها المصور، اسمعه يمة شديكول ، هاي بالبصرة ، صدك جذب ، هيج تاليهه البصرة ، جانت مثل الورد ، شوف شوف الانقاض والزبايل بالعشار شوف هذا النهر شلون متروس انقاض، ألله لا أطاهم العافية على هالاهمال ، لا شارع جديد لا بناية  سكنية جديدة ، لا مدرسة جديدة.  شوف يمة شوف ، هاي غير  صورة ، أي يمة جنهه ببغداد ، مو هذا حي الفضل ، وين أم نوري تسكن ، أي يمة هوه هوه هوه ، شلون مخرب ، شلون وساخة ، شلون سيان ، أيباه ، صدك لو كالوا أطي الخبز بيد خبازته ، هيه كوه خو مو كوه ، ناس مو شغلتهه ، ما تعرف تفيد بلدها ولا تسمع نصيحة أحد. صدق بشار بن برد رحمة الله عليه لمن قال:  " لقد أسمعت لو ناديت حي ا – ولكن لا حياة لمن تنادي ". والله يمة ما أدري شكول ، شلون ما داشوف هالانتخابات ما راح تسوي تغيير بهالبلد المحسود...؛؛

علي ألأسدي